In memoriam Alex Alberto (1946 - 2013)

door Quito Nicolaas

E fayecimento di Alex Alberto (efm) a conmove mi y bastante hende, pero di con un persona lo puntra su mes? Alex tabata biba na Lelystad y ami mes ta di Almere.Ora bo bishita su cas, bo ta kere cu ta den un avion b’a drenta. Den su sala e ta tin dos di e stoelnan di e rijnan di dos stoel den un avion di KLM, ta wak bo den bo cara y ta invita bo pa sinta aden. Nan tabata situa di tal manera cu nan tabata fungi como e luga preferi, unda Alex sa sinta pa wak television. Y di mes a cuminsa un combersacion encuanto aviacion y su pasion como spotter pa saca potret of filma ora e avion ta ateriza na Schiphol of ta lanta buelo.  

Via Facebook nos a bin ta entercambia di idea cu otro. Alex nunca tabata mete cu politica, ni pa haci un expresion den cualkier direccion.  Den circulo chikito e tabata ventila su opinion si over di e situacion na Korsou. Sinembargo e tabata tin un manera trankilo di splica un persona algo, cu dificil bo por malcompronde of diferencia di opinion cu ne. Alex tabata tin un bon manera di comunica cu hende y sa con pa convence nan di algo. E no tabata un persona cu ta duna bo un trato-preferencial tampoco y cu esaki e kier a demostra tambe cu den e ramo di su trabou bo mester keda neutral y trata tur hende igual. Y esaki tabata un di su caracteristicanan cu mi tabata admira masha tanto mes den su persona.  
 

Despues cu Alex a ripara cu mi tin bastante amistad ta biba na Korsou, un biaha el a puntra mi si mi a yega di biba na e hermana isla di Korsou. Mi contesta tabata cu noh, pero durante añas e amistad entre e dos pueblonan a keda intacto. Y mescos cu ami conoce yen di hende di Korsou, asina tambe e otro Arubianonan tin nan famia, conocirnan y amigonan ta biba na e isla aki. Despues di esey e tabata interesa pa sa tambe con mi conoce algun di e personanan di peso, pero e contesta ta cu ta via di mi trabounan. Desde e dia ey tambe el a duna mi e nomber ilustre of si e tin un pregunta, e ta bisa mi: “Ilustre Quito”.

Cu e campaña di lesamento na 2006 – Nederland leest - , e defunto a sorpresa mi e dia 24 di oktober ey. Mainta tempran – banda di 09.30 – Alex a aparece cu su camara y el a bin pa registra e actividad aki, unda mi a keda di hiba palabra. En berdad el a filma tur cos y despues a entrevista mi. Despues mi ta bin ripara cu Alex tabata tey mas tempran, pasobra el a filma pafor di e edificio tambe, unda e actividad a tuma luga. Mi ta corda ainda con ora e ta bay, cu e camara riba su schouder drechi e ta duna mi un man cu su man robes pa saluda mi. Asina un persona Alex Alberto tabata, un persona simpatico cu un curazon di oro.

Na 2007 cu e Koninkrijksspelen a tuma luga na Den Haag, mi mester a actua e anochi di 20 di juli den Nutshuis Bankhal. Pa e declamacion di mi poesianan mi a acerca Alex, pa traha un compilacion di diez minuut cu mi por uza como pelicula pa compaña mi . Tabata un paar di dia prome cu e actuacion mester a tuma lugar, cu mi a biaha pa Lelystad cu e video di ‘Antilliaans verhaal’ cu lo mester a corta algun escena y monteer esaki di nobo. Ora mi a drenta su cas, mi a keda wak rond: tur caminda tabata tin monitor y aparatura di grabacion. Si un otro hende tin un biblioteca di buki, Alex tabata tin un biblioteca di videos cu e tabata colecciona. Asina pasiona e tabata cu su trabou y tur loke el a yega di graba den su bida. Alex mes a bisa mi na un manera gracioso: “Esaki ta mi hobby.”

Un otro biaha cu nos a topa otro, tabata na 2009 e anochi di e celebracion di 10 aña di existencia di e Cas di Cosmetica Nubian Queen. Di aleu mi ta wak Alex ta cana rond cu su camara y ta trata na registra e diferente oradornan di e anochi aki. E tabata drenta y sali e establecimento, buscando un bon shot pa e filma y naturalmente di e huespednan di e anochi di gala aki. Diripiente Alex a aparece riba mi, indicando: “Quito, para bo eynan un rato asina.” Asina na un forma sorpresivo e ta yega filma bo. E loke a sobresali e anochi aki tabata e amistad caluroso cu ta existi entre Alex y Germaine & Corinne Hernandez, propietarianan di Nubian Queen. Mi kier sa cu tabata na 2008, cu e anochi anterior cu el a viaha pa Korsou pa celebra un reunie cu e yiunan, cu el a pasa cerca mi na cas pa entrega un grabacion di un entrevista. Un Shon di hende, cu si e priminti algo e ta cumpli cu ne tambe.

Pesey mi kier bisa cu Alex Alberto ta un persona cu a percura pa hopi di nos artistanan a bira grandi y ricibi e atencion di e publico televidente. Ami y mi ta kere hopi di nos artistanan mester ta hopi agradecido na e empeñonan cu Alex a haci pa trece nos imagen na television. Un di e ultimo biahanan cu mi a topa cu Alex, caminda el a filma mi tambe, tabata e celebracion di e Fiesta de la Chinchira, na september aña pasa na Tilburg. Nos ultimo encuentro tabata na Dia di Aruba 2013, unda cu el a pasa cuminda mi y atrobe cu su man robes e ta sagudi mi man.

 

Alex, sosega awor cu bo mision na mundo a keda cumpli. Danki pa tur cos.